Beasties - Helen Cruickshank

Clock-leddy, clock-leddy
    Flee awa' hame,
Your lum's in a lowe,
    Your bairns in a flame;
Reid-spottit jeckit,
    An' polished black e'e,
Land on my luif, an' bring
    Siller tae me!

Ettercap, ettercap,
    Spinnin' your threid,
Midges for denner, an'
    Flees for your breid;
Sic a mischanter
    Befell a bluebottle,
Silk roond his feet -
    Your hand at his throttle!

Moudiewarp, moudiewarp,
    Howkin' an' scartin',
Tweed winna please ye,
    Nor yet the braw tartan,
Silk winna suit ye,
   Naither will cotton,
Naething, my lord, but the
    Velvet ye've gotten.

---

Helen Cruickshank (1886 - 1975) Scotland
Clock-leddy - Ladybird (Coccinella septempunctata)
Ettercap - Spider (Araneae)
Moudiewarp - Mole (Talpa europaea)